Мин – орлык

Бу дөнья гел тетрәнүдән тора –
Сынаулардан тора кешелек:
Бәндәләрне кырып китә бер чир,
Икенчесе килә ишелеп!

Бу дөнья гел тетрәнүдән тора –
Күпме сынау килә кешегә…
Чишмә корый, елга-сулар кибә,
Таулар булып таулар ишелә.

Кешелек гел сынаулардан тора:
Сугыш, зәхмәт, бәла-казалар…
Берәүләргә байлык биреп сыный,
Берәүләргә бирә – җәзалар.

Минем халкым күпме кайгы кичкән –
Тарих аны мәңге онытмый…
…Ишелергә торган тау – мин түгел,
Тишелергә торган орлык мин!

11 декабрь, 2021 ел

“Бисмилләһир-рахманир-рахим.
Рабби зидни гыйльмән вә фәһмән вәәл – хыйкни биссалихин. Раббишрахли садри вә йәссирли әмри вәхлүл гукъдәтән мин лисани йәфкаһү каули, йә Хафиз, йә Ракыйб, йә Нәсыйр, йә Аллаһ. Рабби йәссир вәлә тугъассир. Рабби тәммим билхайр”.

Мәгънәсе:”Мәрхәмәтле вә рәхимле Аллаһ исеме белән башлыймын.Раббым! Гыйлемемне һәм зиһенемне арттыр. Мине салих колларыңнан әйлә. Раббым! Күкрәгемне ач, эшемне җиңеләйт һәм телемдәге бауны тиз чиш ки, әйткән сүземне аңласын. Әй, Саклаучы, Күзәтуче. Ярдәм итүче Раббым! Җиңеләйт, авырлатма, Раббым! Эшемне хәере белән тәмамла”.