Бүген “Тәртип” радиосында “Тәртипле иртә” тапшыруында кунакта булдым. Алып баручылар Айгөл Нәбиуллина белән Илфак Шиһапов сорауларны яудырдылар гына. Радио тыңлаучылар шалтыратып та, ватсап төркеменә язып та сорауларын җиткерделәр. Шигырьләр дә, минем сүзләргә язылган популяр җырлар да яңгырамый калмады, билгеле.
Тапшыруны иртән тыңламый калучылар аны бүген кичке сәгать 22.00 тыңлый алалар.
“Тәртип”нең һәрвакыт чын әдәбиятны, сәнгатьне халыкка җиткерүче милли радио булып калуын телим.

Казан шәһәре музей комплексының
Әмир Мәҗитов музеенда Г.Тукайның туган көне уңаеннан әдәби-музыкаль кичә үткәрелде. Кичәдә шагыйрьләр Розалина Шаһиева, Рәмис Аймәт, Гөлназ Газизова, Казан шәһәр филармониясе артистлары Айдар Габдинов, Сиринә Зәйнетдинова, Алмаз Хәсәнов, Айзат Шәйхелмәрдәнов,
Казан шәһәренең 96 нчы һәм 40 нчы гимназия укытучылары һәм укучылары катнашты.

Тамашачылар шулай ук Санкт-Петербург рәссамы Рәмзия Зиннәтованың «Ностальгия» дигән нәкыш һәм графика күргәзмәсе, Казан шәһәре музей фондларыннан гамәли бизәлеш сәнгате күргәзмәсе белән дә таныштылар.
Кичәне музейның өлкән фәнни хезмәткәре Рәмзия Хәлиуллина әзерләде һәм алып барды.